На Кастрычніцкай плошчы ў Менску была разагнаная акцыя з патрабаваньнем вызваліць актывістаў апазыцыі, арыштаваных пасьля выбуху 4 ліпеня.

У 18.00 каля 50-ці прадстаўнікоў палітычных партый і рухаў сабраліся на Кастрычніцкай плошчы на знак пратэсту супраць узмацненьня рэпрэсій у дачыненьні да дэмакратычных актывістаў.

Амаль на самым пачатку акцыі дэманстрантаў выцесьнілі з Кастрычніцкай плошчы і павялі вуліцай Янкі Купалы ў бок Багдановіча. Людзям, якія падыходзілі на Кастрычніцкую плошчу пазней за 18 гадзін, не давалі далучыцца да дэманстрацыі пратэсту. Міліцыянты моцна штурхалі людзей. Анатоля Лябедзьку спецназаўцы павалілі на падлогу і пачалі біць нагамі, у яго зафіксаваныя медыкамі гематомы ног і жывата.

ЦІкава, што ўвесь час калёну суправаджалі двое асобаў блізкаўсходняй зьнешнасьці, якія ўвесь час выкрыквалі лёзунгі, крычалі дэманстрантам, што яны ўсе “прадаліся ЗША”, “служаць Бушу” і падобнае.

На скрыжаваньні вуліцы Варвашэні і Багдановіча каля казіно “Белая вежа” дэманстранты і спэцназаўцы раптам убачылі пусты пакет з-пад соку, і гэта выклікала сьмех і ў адных і ў другіх.

Урэшце пачуўся загад – нікога не затрымліваць. Спачатку дазволілі сысьці з натоўпу Віктару Івашкевічу, а потым далі разыйсьціся іншым дэманстрантам.

Прадстаўнікі апазыцыйных партыяў заявілі, што пасьля гэтага адбудзецца паседжаньне Палітрады, дзе будзе вызначана – ці варта наагул ісьці на выбары і ў якой якасьці.

Відэа:

Фота Хартыя'97, Наша Ніва, Баймедыа