Сёння ў Вільні ля амбасады Кітайскай рэспублікі адбылася акцыя салідарнасці са змагарамі за вольны Тыбет. У акцыі, акрамя літоўцаў, удзельнічалі і беларусы - студэнты ЕГУ і актывісты БУНТ'у.

Пікетоўцы трымалі ў руках сцягі Тыбету, плакаты "Free Tibet", "Stop terror", інфармацыйныя матэрыялы са звесткамі аб антызаконных дзеяннях кітайскага ўраду ў дачыненні да мірнага насельніцтва Тыбету. Грала тыбецкая музыка.

Супрацоўнікі амбасады з цікавасцю назіралі за акцыяй з вакон, аднак да пратэстоўцаў ніхто не выйшаў. Да амбасадара была накіравана петыцыя з выказваннем абурэння палітыкай Кітая.

Заўтра і ў пятніцу а 12-й гадзіне дня пікет паўторыцца.